中秋有月餅、聖誕有聖誕老人，復活節你又會諗起啲咩？復活蛋、復活兔…不過你又知唔知呢佢哋係點樣演化成呢個現代模樣呢？

復活節籐籃：復活節籐籃嘅出現可以追溯到中世紀。歐洲各地嘅天主教徒會喺大齋期結束後喺教會舉辦彌撒和節日大餐，教徒通常會帶個籐籃去接受神父嘅祝福。最終演變到現代用嚟盛載糖果同點心嘅用途。

復活節草：你有冇諗過點解復活籃入面嘅復活蛋都有一堆草包圍住？相傳呢個係荷蘭人嘅傳統，小朋友會準備一堆草等待復活兔放雞蛋入去。呢個傳統就跟埋德裔賓夕法尼亞人一齊移民到美洲，估計當時貪一時方便就將籐籃同草堆結合埋一齊啦。

復活兔朱古力：其實早喺朱古力出現前，德國已經有人將糕點同甜品製成兔仔造型，至1830年第一粒朱古力面世後，就開始有人喺復活節整朱古力復活兔。不過呢個傳統要到1890年嘅復活節先成為風潮，當年有一個美國人整咗隻五英呎高嘅復活兔擺喺自己間藥房應節，從此朱古力復活兔變成復活節必備物品之一。

染色復活蛋：以前基督教大齋期期間會禁止食用肉類同雞蛋，所以大齋期過後，復活節嘅慶祝宴會上都會有雞蛋，有啲人就開始喺雞蛋上裝飾或畫畫，直到1880年PAAS染料出現更令越來越多彩繪復活蛋出現。

資料來源：buzzfeed.com
原圖：clintoncountyohio.com