端午節將近，傳統上大家都應該會食返隻糉應吓節既。近年糉既款式愈來愈多，令人花多眼亂，到底應該點樣選一隻啱自己既糉呢？   香港營養師協會認可營養師潘德翹日前接受《東方日報》訪問時提醒，傳統裹蒸糉餡料豐富，熱量是眾糉之冠。一隻400克的裹蒸糉，熱量大約有870千卡同大約9茶匙脂肪，遠超每日可攝取上限40%。至於近年有啲酒樓食肆，甚至加入鮑魚、瑤柱等貴價海味做糉，務求做到「金碧輝煌」，不過由於海味普遍含較高「普林」量，容易導致痛風惡化，有痛風問題既讀者就要小心喇。   所謂「普林」，其實就係「新陳代謝」過程中的一種代謝物，簡單而言，如果身體唔可以將普林排出身體的話，呢種物質最終會形成尿酸，容易引發或令痛風惡化。   至於近年有人以「較健康」為由，用黑米、紫米等代替一般白糯米作為糉既材料，到底咁係好咗，定冇咁好呢？潘德翹話，黑米、紫米雖然唔會令糉含熱量有所改變，但黑米含有較高鉀質，比糯米高近3陪，高鉀食物可以有效控制血壓。至於有人喺糉加入紅藜麥，潘德翹指出，雖然藜麥含高蛋白質，而且不含脂肪，但因糉本身會加入鹹蛋黃、豬肉等「肥嘢」，每百克既糉仍含近200千卡熱量，其實同其他糉相距不遠。   老老實實，雖然端午節係傳統中國節日，糉亦係最受歡迎既應節食品之一，不過糉同時都係熱量超標既食品，加上營養唔算豐富，所以建議大家都係食一隻「迷你健康糉」應吓節算喇。至於點叫做「相對地健康」？重量100克左右，用糯米、黑糯米、綠豆、瘦肉、罐頭三角豆、番薯、乾貝等材料去包，就為算得上係「較健康」。   圖片來源：大公報