禮賓府一年一度既開放日，嚟緊星期日就到喇，以往大家去禮賓府，由於唔可以進入禮賓府裡面，所以除咗賞花以外，其實冇乜可以睇。不過實情當然唔係咁啦，禮賓府仲有其他嘢睇架，其中裡面就有部價值三萬蚊左右既「樹枝粉碎機」（碎木機），其實都好值得大家留意。

可能大家話，碎木機啫，有乜咁特別呀？唔好睇小呢部碎木機呀，查實佢主要係用嚟處理一啲跌到周圍都係既樹枝，禮賓府個花園咁大，又咁多樹木，要處理既樹枝同枯葉，自然就多到嚇死人，而且部份仲好大型，所佔既空間一啲都唔少。呢部機好就好在，只要將啲巨型樹枝成枝放晒入去，部機就會將樹枝打成碎塊，將來無論係運送，但只係單純要清走，亦容易好多。

身為禮賓府住客，平時又喜歡種植植物，特首梁振英話，碎咗既樹枝，可以用返嚟做肥料，相對化學肥料就唔使用咁多，可以話係相當環保。而家喺禮賓府部機算係試驗性質，他朝可以既話，希望可以推廣到去康樂及文化事務署轄下既公園，方便工作人員清理樹枝落葉。至於事唔事成，暫時仲未有定案。