話咁快又一年，新正頭一家人最緊要齊齊整整度歲，原來連五大行星也來湊熱鬧，形成「五星連珠」一起慶團圓。所謂「五星連珠」就是指太陽系最閃說的五顆行星：水星、金星、火星、木星及土星連成一線，大家只要於新春期間「頂得住」睡魔，「天濛光」揀個光害少、東南方近地平線的無遮擋有利位置，好似西貢萬宜水庫東壩、石澳等等，甚至隨處抬頭一望，憑肉眼便可試試觀賞這個罕見的天文現象。

今次「五星連珠」最佳的觀賞時間是日出前約一小時。木星會首先於深夜時分由東面升起，帶黃色的土星及呈燈紅色的火星，以及金星緊隨其後，而最後升起的，則是東南偏東面的水星。天文發燒友指，雖然水星最接近地平線，但由於其亮度暗，較其他四大行星「怕醜」，大家要睜大雙眼，畀足心機先可以睇晒五星「全相」！

其實，五星早於上月底已慢慢匯聚，農曆新春期間將會是觀賞今次「五星連珠」現象的最後機會。其中，繼木星、火星及土星後，最後兩顆行星金星及水星，亦將於今晚及年廿九(7日)運行到月亮旁，大家大可借助月亮光來觀星。

原圖：網絡