做運動一定要跑？No la！有時只是爬上滑落、跨跨跳跳，都足以令你大汗淋漓！本月21日啟德郵輪碼頭對出空地將設置長達3公里的瘋狂障礙跑道，參加者需要一條路「衝破」沿途11個氣墊關卡，有的需要攀爬、有的要「捐隧道」 ，也有跨的跳的。其中最大的障礙就講求勇氣夠、意志強，皆因挑戰者必須先攀上26呎高的假石，再沿充氣滑梯直瀡落地；不過，最細的一個都別以為「小兒科」，挑戰者要non-stop雙腳交替越過重重「地窿」，「腳骨力」不足都隨時投降。

「瘋狂障礙跑」於本月21日早上9時舉行，參加者必須先報名，分有公開組及親子組，公開組需要年滿13歲，收費每人$480；親子組則須由一名成人陪同一名6至12歲小童參與，套票收費為$680。活動負責人謝先生指，為有效維持秩序，參加者將會分不同時段出發；若錯過障礙物，亦不能跑回頭路重新玩，他預計只須45分鐘至1小時便可完成整段「賽程」，「我哋唔係要鬥快，just for fun！香港人生活壓力太大，活動除咗測試你的體力，仲有平衡力、手腳協調等，幾個親友一齊玩，睇住你企唔穩跌落張墊，都幾搞笑！」

大會預計最多可容許10000人報名，目前約報了一半，本月18日截止報名。詳情及報名可瀏覽https://www.facebook.com/crazyinflatablerun/。

原圖：瘋狂障礙跑提供