本文作者為國藝娛樂文化集團主席冼國林

關於公務員是否應該政治中立呢個問題呢，公務員事務局局長包括張建宗司長嘅答案不知所謂。佢哋話公務員如喺私人時間發表的言論同工作冇抵觸嘅話，應該可以接受。呢個完全係一個驚孭鑊嘅答案。公務員守則寫得好清楚，必須效忠特區政府同埋支持香港特首，即係話，佢係唔可以做出一啲行為同特區政府同政策互相違背嘅事情。例如警務處長職責係執法，但係佢休咗班之後話以私人立埸來講佢係唔支持政府嘅，大家如何分割清楚？

除咗公務員守則之外，所有紀律人員都係被假定24小時當值，咁如果喺網上發表言論鬧政府，大家又可唔可以接受呢？我話畀大家聽，唔只係接唔接受嘅問題，佢哋咁係違反咗公務員守則，即係合約。公務員守則係公務員同政府訂下嘅合約，即係好似我哋私人機構同另一間公司的合約裏面，如果有保密協議或者唔準講一啲抵毀對方嘅說話，不遵守就係違約。言論自由係可以透過合約規範。一個藝人合約裏面有寫唔可以做一啲影響公司形象嘅行為，即係包括私人時間，如果佢做咗，佢都係違約，除咗解約之外重要賠償畀公司。

最近澳洲政府有一個公務員喺Twitter匿名批評政府嘅移民政策，結果被澳洲政府發現咗炒咗佢，最後高等法院裁定澳洲政府合理解僱，因為佢就係違反咗公務員守則。儘管澳洲二百萬公務員不滿，但係呢個係最後判決，因為身為公務員必須絕對支持政府嘅政策係不用商榷。如果你唔支持政府嘅政策，可以選擇離開，因為喺自由社會，你有權選擇你喜愛嘅工。

另外，公務員事務局亦都應該嚴格執行公務員守則，對違反守則嘅公務員加以紀律處分，包括書面嘅警告、降級或革退。最近律政處一名高級檢控主任及消防處有18名消防員集體喺社交網站公開反政府，呢一批人其實可以一次過全部革退，特別係檢控主任，因為他的政治立埸肯定對工作有影響。

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app