本文作者為國藝娛樂主席兼創辦人冼國林

最近發表很多言論，有人問我有冇政治立場，我不是藍或黃，因為我認為是非只有錯與對、不理藍黃。我只會以事論事和大家分享而已。

兩陣交鋒、各出奇謀，呢個是常見嘅情況，兵不厭詐亦是正常，但要有底線。特別是專業人士發表言論嘅時候，應該嚴格遵守專業操守，唔可以隨便發出不正確專業意見。因為除左右違反自己嘅專業操守（professional ethics）之外，更會令到好多誤信嘅人因而做錯事而要承擔法律責任。我不恥一啲專業人士利用自己專業地位刻意去誤導公眾、去達到自己嘅某種目的。

荃灣開槍事件由於調查正在進行中，我唔講太多，但係就住一位專科心臟醫生發表嘅言論，我覺得我真係要講幾句。呢位醫生佢話「傷者生命危在旦夕，當時嘅警察三分鐘之後先至進行初步施救係非常不人道，因為咁樣係會令傷者當時因為中槍而出現張力性氣胸、肺漏氣」等等，我聽到之後都忍唔住要為現場嘅警務人員講一句公道說話。

我曾經受過急救訓練，訓練過程中導師都講得好清楚，我哋學嘅急救係好基本，只適用於簡單受傷或者撞傷進行包紮或止血，但係全身骨折或者唔知道內部情況，我哋係盡量減少移動傷者，因為我哋唔係專業嘅醫護人員。當時呢個中槍者胸口中彈，但係身體裏面係咩狀況冇人知道；佢入咗醫院，幾位醫生都需要幾個鐘頭先去攞到粒子彈出嚟，並發現距離左胸係好近。我想問，一個警務人員對於咁複雜嘅槍傷，可以進行施救嗎？咁深奧嘅氣胸、肺漏氣，有幾多人知道是乜？其實當時有警務人員用物料去按住個胸希望止血，已經是超越他工作範圍，他們應該留返俾專業救護員盡快將傷者送院治理。因為萬一該警員用力大咗、影響子彈位，到時又會怪責他做壞事情。

呢個專業心臟醫生佢係好清楚呢個中槍情況係好複雜，莫講係一個警務人員，就算一個普通醫生都唔可以應付到。佢咁樣指責警務人員係完全有失他的專業操守。當時警務人員在佢有限認知之內為傷者進行止血 ，其實已經做多左，所以唔單只唔應該受到指責，而是應嘉許。

兩兵交鋒用咩手法都好，但是不應過份違背自己良心去做事。好多人對警察有所不滿，但某啲情況可以選擇唔出聲，但係唔應該散播一啲不正確嘅言論刻意加深大眾仇警嘅嘅心態。我都有對政府好多不滿，我一直認為應該有不同嘅反對聲音去監察政府，但我唔認為用暴力破壞甚至傷害唔同政見嘅市民，係一個合理嘅方法。不滿政府，目標就應該是政府甚至是決策高官，而不是無辜市民或者奉命行事的警員及家屬。我奉勸各位專業人仕，如果政府或執法人員真係有專業失職，你可以狠狠地毫不留情指罵，但係絕對唔應該指白為黑去發表所謂專業意見去加深矛盾。如果你真係為香港好嘅，請你哋手下留情。

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app