本文作者為立法會議員李慧琼

最近小一派位放榜，有人歡喜有人愁。筆者在區內茶餐廳聽到兩位女士的對話，覺得有點意思，想跟各位讀者分享。

筆者不知她們貴姓，就稱他們為鄧太和甘太吧。

鄧太：「你有冇聽到張太講呀，佢個孫派咗XX呀，個女開心到話要請晒佢哋去日本呀！」

甘太：「咁佢個女不嬲都緊張個仔入唔入到名校㗎啦，你唔記得咩，早幾年佢哋又搬屋、又學呢樣學嗰樣，一個月使幾萬蚊。而家咪好囉，得償所願！」

鄧太：「咁我地同張太幾廿年街坊，都戥佢開心嘅，只不過有時見到佢個孫，硬係覺得佢好似悶悶不樂咁，最慘我有次同張太講，佢都點點頭，但叫我唔好講。」

家長均望子成龍

甘太：「哎，你咪鬼咁多事喇，而家新一代有佢哋嘅方法培養小朋友，同埋講真，佢哋都係想自己個細路好啫，有邊個唔想望子成龍吖！」

鄧太：「係······之但係······」

甘太：「我知你想講咩，你想話我哋個仔都唔係讀名校，但最後都一樣可以港大畢業吖嘛。係咪？！」

鄧太：「哈哈，衰鬼······」

甘太：「當年都係因為你啦，你話寧願個細路喺Band2考第一，都唔好喺Band1考第尾。」

鄧太：「咁係吖嘛！」

甘太：「所以我多謝你呢個姊妹囉！」

鄧太：「咁呢餐你啦！」（小題為編輯所擬）

原文轉載自《都市日報》 2019年6月6日

原圖: RTHK