友人小登科，眾同學道賀，一齊「去飲」。大家不要誤會，我真的是出席婚宴。

話說婚宴的第一道菜，必定是燒得火紅的小乳豬。剛上菜，身邊的爛gag王朋友已經開始問：「如果佔中係去飲，咁鴻運乳豬又應該暗示乜呢？」

「我知！係學民思潮！」我搶答。

這個問題其實不難，我這個對政治較為冷感的港女，平時睇得電視多，都知道，現在講起佔中，一定會順便講埋一班大專生、中學生搞罷課。「乳豬，就是年紀細的豬，仲唔係講緊學生仔！」

講真，一年幾前聽到有人搞「佔中」，都真係有啲擔心。雖然我唔響中環返工，又唔係成日去IFC行街，但如果中環一帶塞住，周邊肯定都會受影響。之前泰國暴亂、越南反華，我都被逼擱置咗旅遊計劃，如果香港有類似情況，一定會影響香港形象。

不過，搞下搞下，見到果三個光頭佬真係得啖笑！當初口口聲聲話公民抗命、違法行為，滿腔熱血正義，點知宜家又話驚煽動違法行為會被警察拉，所以用「去飲」做暗號，鬼鬼祟祟咁。

好啦，用暗號都算啦，可唔可以用個有氣勢少少？睇電視、電影，人地啲暗號都係「旋風」、「火影」、「寒戰」咁，聽落好型、好神秘，宜家話「去飲」，個個「去飲」都係嘻嘻哈哈架啦，同公民抗命完全唔同feel囖。

仲有，前日陳健民提出和平佔中5項紀律要求，包括必須接受台上指揮、不可使用大聲公或展示與大會訴求不一致的標語，咁即係人地想表達下自己訴求、意見都唔可以？爭取民主的活動，點解咁專制架。規矩又包括，被捕時不可反抗或大力掙扎，咁你一坐低，警察就清走你，究竟個活動搞黎做乜？就係為咗浪費警力搬你哋走？

戴耀廷早前在電台話，自己有一日半夜三、四點從夢中醒來，「在夢境裏，中環出現好多好多好多人，多人到一個地步，不只遮打有人，大會堂近海邊全都是參與「佔中」的群眾，皇后大道中也擠滿參加者」。堂堂一個大學副教授，竟然要用夢境黎說服人地參與活動，如果佢真係發咗哩個夢，只能奉勸一句：「咪發夢啦，係時候醒啦！」