本文作者為立法會議員李慧琼

修訂《逃犯條例》一事鬧得熱烘烘，有天假日聽到一對父女對話，父親看來約是40多歲，女兒則約15、16歲，相信是一名中學生。

女兒：「爸B，學校好多同學都話要反對《逃犯條例》嘅修訂，佢叫埋我一齊反對、一齊去遊行喎，我都唔知點好。」

爸爸：「咁你有冇自己分析過而家社會上支持同反對雙方嘅意見、然後自己作判斷呢？」

女兒：「唔識呀，你都知我冇乜睇新聞㗎啦，但係我學校裏校面最好嘅朋友都話反對，咁我又唔想因為我唔去遊行，佢哋以後唔同我玩，唔理我，唉……」

爸爸：「其實好多事情，社會上唔同嘅人都會有唔同睇法，唔同原因，當中包括佢哋自己本身嘅利益。爸B唔想引導你向某一方偏頗去諗去做，希望你試下立體去睇事情，有自己嘅分析同埋判斷，而唔係隨波逐流、人云亦云。」

女兒：「嗯，我試下啦。咁爸B，你係支持定反對呀？」

爸爸：「就算兩父女，爸B都唔想以我個人主觀意願或政治立場影響你嘅獨立判斷，不過爸B想同你講，我自己奉公守法，所以唔會擔心。爸B亦都相信學校或者書本都有教你哋，犯咗法嘅人應該受到法律制裁，呢個係好合理嘅事。呢件事至少有兩個基本原則，其一係多年以來係咪有犯罪嘅人逃離香港未能引渡返港，又有無外面犯罪嘅人逃入香港而無法引渡返其國家或地區處理？其二係港人在外地違犯咗人地國家或地區嘅法律，係咪要受到當地嘅制裁？香港幾十年來無正視呢個情況，咪有罪犯逍遙法外，或匿藏於港。」

女兒：「立法嘅事，關我哋細路仔咩事？」

爸爸：「今天立法，明天守法執法，梗係關你哋事啦！」

女兒：「嗯，咁我一陣返到屋企上網睇啲資料先。」

爸爸：「乖！」

原文轉載自《都市日報》 2019年5月30日

原圖:RTHK