又話係「政治檢控」？邊個咁夠膽，成日「政治檢控」我哋班「尊貴的」反對派立法會議員？唔使估喇，咪就係香港警察囉，警方打算預約拘捕林卓廷同尹兆堅兩名立法會議員，講明事件係涉及今年6月13日呢兩名議員喺立法會上嘅行為。不過點解係「政治檢控」呀？唔知架，佢兩個自己講之嘛，反對派每次被檢控，都一定話係「政治檢控」架啦，講你就信咩，傻的嗎？

民主黨在會議廳示威

話說當日，立法會當時正審議高鐵「一地兩檢」條例草案，喺運房局局長陳帆發言時，有民主黨議員高叫口號，一度打斷陳帆發言，期間有多名民主派議員抗議立法會主席梁君彥不准發言，結果被趕離場。事後，林卓廷、尹兆堅同立法會兩名保安報稱受傷，立法會秘書處決定報警處理，事後警方曾到大樓調查搜證。

今次警方係以懷疑「妨礙立法會人員執行職務」為由去預約拘捕佢兩個；而其中尹兆堅更被加控一條「普通襲擊」。林卓廷、尹兆堅兩個今日喺立法會同記者交代事件，劈頭就話今次係「政治檢控」，亦係首次有議員喺立法會議事廳「和平抗議」而遭到刑事檢控，又話當時驅趕得好粗暴，覺得咁樣係令議會好黑暗等等。

妨礙立法會保安員工作屬違法

先唔好講佢兩個有冇犯法，若然要稱得上係「政治檢控」，首要條件就肯定係因為被告嘅「政治立場」，而唔係「行為」被檢控，但睇返當日新聞片，呢兩位議員真係有同保安拉拉扯扯，而且明顯拒絕服從梁君彥驅趕佢哋離場嘅裁決，亦唔肯應保安員要求離場，自己明明係有做過類似行為，咁都叫「政治檢控」？

佢兩個嘅動作有冇構成「普通襲擊」，大可留返法庭去判決，廣男反對更有興趣，到底乜嘢係「妨礙立法會人員執行職務」罪？查一查，原來根據《立法會（權力及特權）條例》第19條(b)款：「凡任何人襲擊、干預、騷擾、抗拒或妨礙任何正在執行職責的立法會人員即屬犯罪，可處罰款$10,000及監禁12個月」。另外，第24條「立法會人員具有警務人員的權力」裡面亦補充「為本條例的施行及刑事法律的應用，每名立法會人員在會議廳範圍內，均具有警務人員的所有權力和享有警務人員的所有特權。」

民主黨請反省自己行為

睇完兩條法例，事實其實非常清楚。梁君彥驅逐呢兩位立法會議員離場，佢兩個拒絕，同保安員拖拖拉拉，最終有人被抬走，有保安員受傷（先旨聲明，冇話佢兩個整傷！），就咁睇字面，都幾肯定有人「妨礙立法會人員執行職務」，就算最後入唔到罪，肯定都唔係「政治檢控」囉。反對派議員，近年成日做埋啲肢體抗爭，但每次被檢控就反射式話係「政治檢控」；老實講，廣男真係覺得唔啱數，明明就有實際行動（冇話一定入罪），咁都可以話係「政治檢控」，到底反對派識唔識呢個詞點解？定係佢哋「識」，但就想靠誣衊政府去撈政治油水呢？

p.p1 {margin: 0.0px 0.0px 0.0px 0.0px; font: 12.0px 'PingFang HK'; color: #000000; -webkit-text-stroke: #000000} p.p2 {margin: 0.0px 0.0px 0.0px 0.0px; font: 12.0px 'Trebuchet MS'; color: #000000; -webkit-text-stroke: #000000; min-height: 14.0px} span.s1 {font-kerning: none} span.s2 {font: 12.0px 'Trebuchet MS'; font-kerning: none}

原圖：港人講地圖片