本文作者為李慧琼/民建聯立法會議員

《議事規則》的討論在社會上遍地開花，筆者最近在公園見到幾位晨運客在高談闊論……

晨運客甲：點解一開會啲議員就企晒係度，做咩？

晨運客乙：呢種叫做呈請書，只要有20個議員同意，就可以成立專責委員會去查呢樣，查嗰樣。啲議員企係度，係話佢哋支持呈請囉。晨運客甲：20個議員就OK ？咪好易？立法會議員個個以為自己係超人，又查這樣，又查那樣，立法會每次有20位議員站立就可以查完又查，搞到立法會無日安寧。

晨運客乙：係㗎。呢種方法真係好容易被人濫用。因為成立就超簡單，十分鐘都唔使，唔使辯論，連票都唔使投，咁就成立咗，不過到真係落手落腳去查，就複雜得多囉。過去立法會都有做過調查，成效就唔記得，但肯定付出大量人力物力，又燒錢又燒時間。

晨運客丙：好似上次調查雷曼迷債，開始嗰時係威係勢，個個爭住入，後來就「爛尾」，搞到一鑊粥，議員一個個咁退出，草草收場。好記得立法會嗰陣足足搞左三年零八個月，花咗接近3,000萬，結果係點？咪又係譴責吓呢個，遺憾吓嗰個，真係唔該晒……

晨運客乙：之唔係，嗰次調查雷曼迷債，已經唔係用呈請書，又喺大會辯論過，又投票通過咗，結果都搞成咁。其實議員點解唔可以做多啲正事，審議多啲法例，推動香港追落後。因為香港部分法例以至政策都好落後，好多科技應用，例如電子支付就輸畀內地幾條街，內地好多地方而家都唔使帶錢出街，唔該呢啲議員就關注吓，推動施政與時並進，唔係仲有益咩。

晨運客丙：你哋講得好有道理，議員選出嚟梗係要佢做嘢，咁我哋都要監察下議員係咪不務正業。最緊要我哋要講多啲，做多啲，支持修改《議事規則》，畀多啲壓力啲議員，叫佢哋唔好再與民為敵，我哋出糧畀你哋唔係想聽佢哋講廢話，做廢嘢……

晨運客甲、乙：支持……

原文轉載自《都市日報》2017年12月14日

原圖：文匯報