假如時光倒流，五個特首參選人變做同學仔，放在同一班房裏，會是何景况？

當過保安局長的葉劉為人義氣，如果有同學仔出貓，而此人是她的死黨，她會力撐，向老師求情。但如果有人欺負她，她一定反擊，戰至最後一兵一卒。你千萬不可得罪葉劉，她一世記得你，找你晦氣。她看不起平庸的同學，但如果你太出色，她酸溜溜，意難平。

曾俊華面懵心精，如果有同學仔出貓，你問他： 「見唔見到呀？」他會模稜兩可做騎牆派。「唔係幾清楚噃。」然後爆幾句笑話，胡混過去。但不要被其騎騎笑和慢條斯理的「薯片」外表欺騙，學詠春和劍擊的他，到生死搏鬥之際，出手快狠準，直擊要害。

林鄭月娥是非對錯分明，如果有人出貓，她一定挺身舉報，即使此人是惡爺都冇有怕。常考第一，得老師疼惜而惹來同學仔「嬲嬲豬」，她頗激氣地說： 「我冇得阻止校長欽點我做總領袖生?！」同學仔排斥她，她委屈地說： 「梗係喇，做班長要摘名，做領袖生要罰同學仔，梗係唔得人鍾意。鬼唔想好似『薯片』咁，淨係做司庫管錢，唔使得罪人。」

胡官熟讀校規，誰人犯規不守秩序，他直斥其非，他是「最佳辯論員」，強於評述，講到天花亂墜，但他只會講波，不會打波。

長毛，常在班房裏鬧事，駁老師嘴、擲粉筆，弄到無法上課，大過小過一籮籮，個底花晒，在被踢出校的邊緣。不過，他是《皇帝的新衣》的小孩，肆無忌憚便把模範生、老師和校長的偽善一語道破，令大家非常尷尬。踢他出校等於承認他說了真話。

班房是選戰的縮影，三歲定八十，五大參選人五十年前的舉止，已決定了今天的勝負。

原文轉載自《明報》2017年2月16日