自由黨立法會選舉新界西候選人周永勤，前排突然宣布棄選，一方面聲稱唔想身邊人惹上麻煩，另一方面又同記者講，同區對手何君堯律師嘅義工要「狙擊」佢，一時間令到何君堯受盡千夫所指，但事後自由黨高層周梁淑怡同田北俊都話，同周永勤傾談間無聽過「何君堯」三隻字。何君堯無端端「周身蟻」，點知周永勤噚日再度開腔，今次又突然將槍頭直指特首梁振英，仲叫香港市民投票，愛護廉潔公平制度咁話。其實計囍雨話，喺無解釋、無理據嘅情況之下不斷指控他人，周永勤先係最破壞公平制度嗰個！

今次周永勤雖然人在歐洲，仍然念念不忘香港市民，喺個人Facebook上面發布「感言」，意思大概話9月4日之後會返香港交代一切，自己對特首梁振英講「解鈴還須繫鈴人」感到可笑。點解可笑？SORRY，冇提到！咁點解「退選」呀？係邊個逼佢？SORRY多次，都係冇提到！

吓，咁周永勤講咗咩呀？冇咩特別，只係貫徹自由黨作風，猛話梁振英上任後呢樣唔好、嗰樣唔好，總結就係堅持「是非黑白做人原則」、「愛護應有的廉潔公平制度」等等，講到慷慨激昂，囍雨真係好感動囉。咁到底佢「退選」同梁振英有咩關係呀？SORRY呀，周永勤又冇講到喇！呢啲叫咩呀？無他，咪就係轉移視線之嘛。

其實周永勤講得啱，我哋絕對應該維護公平制度，但囍雨想講，喺度破壞緊公平制度嘅人，正正就係周永勤你自己。「退選」嘅時候，有意無意將何君堯拉落水，喺無證據指控何君堯等人逼佢退選嘅情況下，形容到何君堯有份咁，如果佢真係咁重視公平，佢咁樣對何君堯公平咩？到9月4日之後先番嚟交代，到時選舉結果塵埃落定，而製造呢場不公平選舉嘅人，捨周永勤其誰呢？

周永勤將行動升級，由原本暗指何君堯到將矛頭指向特首梁振英，囍雨認為事件絕對唔係咁簡單，就算我哋願意相信周永勤係被迫棄選，點樣將事情牽扯，都好難扯到現任特首身上，囍雨唔敢講話周永勤係其他人利用嚟「反梁」嘅一隻棋子，但本身喺新界西選舉毫無勝算嘅佢，首先棄選將矛頭暗指向其他候選人，再自己將事件提升到指控特首嘅層次，佢嘅目的、佢背後嘅勢力想做咩，真係值得深思。

周永勤，唔該你唔好再以受害者自居，講啲唔講啲，全香港合資格選民先係受害者呀！

原圖：周永勤Facebook