近日同政壇高人食飯，席間講起「佔中」呢個熱門政治話題，高人有以下分析，大家不妨睇一睇。

「佔中」三搞手本來有個如意算盤，以為阿爺因為怕「佔中」，所以會在政改問題上讓步。點知如意算盤只打響了一半，這一半就是阿爺真的緊張，因為「佔中」有可能失控，到時香港的金融秩序遭到擾亂，後果可以好嚴重。不過，「佔中」三搞手如意算盤的另一半卻計錯數，而且滿盤皆落索，因為阿爺堅持根據《基本法》落實政改，退無可退，讓無可讓，唯有和「佔中」三搞手對撼一場。

高人話，在政治上稍有經驗的人、包括當年曾經參予中英談判香港前途問題的英國人都知道，中國政府從來都吃軟不吃硬。當年英國首相戴卓爾夫人嚇當時的中國領導人鄧小平，話中國收回香港會有災難性的後果，鄧小平有被嚇倒嗎？英國人搞政治咁多年，最終都要乖乖將香港交返出來，「佔中」三搞手又憑甚麼覺得，自己手上籌碼多得過當年的戴卓爾夫人？

「佔中」三搞手在阿爺就政改表態前已經話要「佔中」，要癱瘓中環，阿爺會腳軟就範嗎？咁就跪低，成個中國咁大咁複雜，點管？戴耀庭當日玩玩吓在報紙投稿，引述美國一本書的主意，話「佔中」可以逼阿爺埋墻，引起注意後愈來愈輕飄飄，愈寫愈興奮，差啲連書都唔使教。

如今阿爺堅持按《基本法》規定，民主派應該吸收經驗，要爭取到阿爺寬鬆，唔可以靠嚇，只可以軟、唔可以硬。

高人分析準唔準，暫時無從證實，只不過大部份市民都唔想香港亂，就肯定係不言而喻。

張祖安

原圖來源：VOA